ទីស្ដីការក្រសួង ៖ ថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស ២៥៦៧ ត្រូវនឹងថ្ងៃទី២ ខែឧសភា ឆ្នាំ២០២៤ នាយកដ្ឋានកិច្ចការពារកុមារ នៃអគ្គនាយកដ្ឋានសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំពិធីប្រគល់វិញ្ញាបនបត្រទទួលស្គាល់មណ្ឌលថែទាំកុមារ ជូនដល់អង្គការ សមាគមទាំង១៣ ដែលមាន១៤មណ្ឌល ក្រោមអធិបតីភាពឯកឧត្តម ឌីន បូរី អគ្គនាយកសេវាសង្គមកិច្ច ដែលមានសមាសភាពចូលរួមពីលោក ភី ណូ ប្រធាននាយកដ្ឋាន លោកស្រីអនុប្រធាននាយកដ្ឋាន លោក លោកស្រីប្រធានការិយាល័យ មន្រ្ដីនៃនាយកដ្ឋានកិច្ចការពារកុមារ និងអង្គការ សមាគមដៃគូ សរុប៦០នាក់។
ក្នុងឱកាសនោះដែរ ឯកឧត្តមបានផ្តល់នូវការណែនាំដល់អង្គការ សមាគម ដើម្បីធានាថាការផ្ដល់សេវាថែទាំជំនួស ទទួលបានប្រសិទ្ធភាព និងប្រសិទ្ធផល ក្នុងគោលដៅការពារឧត្តមប្រយោជន៍ និងសុខុមាលភាពកុមារ ដូចខាងក្រោម៖
- ត្រូវអនុវត្តតាមច្បាប់ គោលនយោបាយរបស់រាជរដ្ឋាភិបាលពាក់ព័ន្ធនឹងកិច្ចការពារកុមារ
- មណ្ឌលត្រូវគោរពឱ្យបានដាច់ខាតតាមប្រកាសលេខ ៦១៦ ស.អ.យ. ចុះថ្ងៃទី២២ ខែវិច្ឆិកា ឆ្នាំ២០០៦ ស្តីពីបទដ្ឋានអប្បបរមាសម្រាប់ការថែទាំកុមារក្នុងមណ្ឌល
- អង្គការ និងសមាគមមិនមែនរដ្ឋាភិបាល មណ្ឌលថែទាំកុមារ ត្រូវទទួលវគ្គបណ្ដុះបណ្ដាលថ្នាក់ជាតិ ស្តីពីគុណវឌ្ឍអង្គការ សុវត្ថិភាពពីក្រសួង ស.អ.យ. ដើម្បីបង្ការទប់ស្កាត់ រាយការណ៍ និងឆ្លើយតបចំពោះករណីរំលោភបំពាន
- ការអនុញ្ញាតឱ្យកុមារមករស់នៅក្នុងមណ្ឌលថែទាំកុមារ ត្រូវគោរពតាមនីតិវិធី អនុវត្តគោលនយោបាយ ស្តីពីការថែទាំជំនួសចំពោះកុមារ ហើយការទុកដាក់កុមារនៅក្នុងមណ្ឌលថែទាំជាជម្រើសចុងក្រោយ និងបណ្ដោះអាសន្ន
- បន្តតាមដានកុមារដែលបានធ្វើសមាហរណកម្មទៅកាន់គ្រួសារក្នុងសហគមន៍ ដើម្បីធានាថាពួកគេទទួលបាន សុខុមាលភាព និងសុវត្ថិភាពនៅក្នុងសហគមន៍
- អង្គការ និងសមាគមមិនមែនរដ្ឋាភិបាល ដែលមិនមានកិច្ចព្រមព្រៀងគម្រោង ត្រូវស្នើសុំការគាំទ្រគម្រោងកម្មវិធី (MoU) ជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា និងរក្សាបាននូវគោលការណ៍ អព្យាក្រឹត្យ ស្របតាមច្បាប់ស្តីពីសមាគម និងអង្គការ មិនមែនរដ្ឋាភិបាល។
