រាជធានីភ្នំពេញ ៖ ឯកឧត្តម ម៉េត មករា អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ ចូលរួមជាសហប្រធានជាមួយ លោក ចូ សូយ័រ ប្រធានទីភ្នាក់ងារអង្គការសហប្រជាជាតិប្រចាំនៅកម្ពុជាដឹកនាំកិច្ចប្រជុំលើកទី៣ របស់ Steering Committee នៃកម្មវិធីពន្លឿនសិទ្ធិជនមានពិការភាពនៅកម្ពុជា (Accelerating Disability Rights in Cambodia)។

១. ណែនាំសហប្រធានថ្មីមកពីរាជរដ្ឋាភិបាល

២. ចែករំលែកសមិទ្ធផលគម្រោងដំណាក់កាលទី១

៣. បង្ហាញពីលទ្ធផលវាយតម្លៃគម្រោង

៤. ពិភាក្សានិងអនុម័តសកម្មភាពគម្រោងដំណាក់កាលទី២

៥. ផ្សេងៗ។

ឯកឧត្តម ម៉េត មករា បានថ្លែងអំណរគុណចំពោះលោក Jo Scheuer ក៏ដូចជា លោក លោកស្រី ប្រធានភ្នាក់ងារអង្គការសហប្រជាជាតិ ដែលបានគាំទ្ររាជរដ្ឋាភិបាលកម្ពុជាជារួម និងដោយឡែកក្រុមប្រឹក្សាសកម្មភាពជនពិការលើការងារពិការភាព។ ក្នុងកិច្ចប្រជុំនេះបានបង្ហាញនូវកិច្ចសហប្រតិបត្តិយ៉ាងស្អិតរមួតរវាង រាជរដ្ឋាភិបាលកម្ពុជា តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា ក្រុមប្រឹក្សាសកម្មភាពជនពិការ ក្រសួងសេដ្ឋកិច្ច និងហិរញ្ញវត្ថុ, ក្រសួងព័ត៌មាន, ក្រសួងការងារ និងបណ្តុះបណ្តាលវិជ្ជាជីវៈ, ក្រសួងវប្បធម៌ និងវិចិត្រសិល្បៈ ជាមួយនឹងអង្គការសហប្រជាជាតិប្រចាំនៅកម្ពុជា ជាពិសេស UNDP, OHCHR, UNESCO និង ILO។

កម្មវិធីនេះបានគាំទ្រដល់រាជរដ្ឋាភិបាលកម្ពុជា លើការតាក់តែង និងអនុវត្តលិខិតបទដ្ឋានគតិយុត្តនានាដែលទាក់ទងនឹងពិការភាព ជាពិសេស ការធ្វើវិសោធនកម្មច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ការអនុវត្តផែនការយុទ្ធសាស្រ្តជាតិស្តីពីពិការភាព ២០១៩-២០២៣ និងសេចក្តីព្រាងផែនការយុទ្ធសាស្រ្តជាតិស្តីពីពិការភាព ២០២៤-២០២៨ ព្រមទាំងសេចក្តីព្រាងរបាយការណ៍របស់រដ្ឋាភិបាល លើការអនុវត្តអនុសញ្ញាស្តីពីសិទ្ធិជនមានពិការភាព ព្រមទាំងការបង្កើតប្រព័ន្ធឧបករណ៍តាមដាននៃការអនុវត្តផែនការយុទ្ធសាស្រ្តជាតិស្តីពីពិការភាព និងការបង្កើនសមត្ថភាពដល់មន្រ្តីនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ ក្រុមប្រឹក្សាសកម្មភាពជនពិការរាជធានី ខេត្ត និងក្រសួង ស្ថាប័ននានាជាដើម។ មិនត្រឹមតែប៉ុណ្ណោះទេ កម្មវិធីនេះក៏បាន គាំទ្រដល់អង្គការតំណាងជនមានពិការភាព កម្មវិធីអភិវឌ្ឍន៍មនុស្សគថ្លង់ និងជនពិការចិត្តសង្គម ក្នុងការលើកកម្ពស់សិទ្ធិ ការចូលរួម និងការទទួលបានសេវាគាំទ្រសង្គមនានាពីរាជរដ្ឋាភិបាលនៅថ្នាក់ក្រោមជាតិផងដែរ។កិច្ចប្រជុំបានពិភាក្សាគ្នាលើសកម្មភាពយុទ្ធសាស្រ្តមួយចំនួនដែលនឹងគិតគូរក្នុងការលើកកម្ពស់សិទ្ធិ និងការចូលរួមរបស់ជនមានពិការភាព ក្នុងការអនុវត្តច្បាប់ និងផែនការយុទ្ធសាស្រ្តជាតិ ក្នុងកម្មវិធីបន្ត ដែលនឹងត្រូវពិភាក្សាដោយក្រុមការងារ ដើម្បីដាក់ឆ្លងគណៈកម្មការវាយតម្លៃក្នុងកិច្ចប្រជុំលើកក្រោយ៕