ខេត្តរតនគិរី ៖ ថ្ងៃអង្គារ-ពុធ ៣-៤កើត ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១២-១៣ ខែមីនា ឆ្នាំ២០២៤ អគ្គលេខាធិការដ្ឋានក្រុមប្រឹក្សាសកម្មភាពជនពិការ សហការជាមួយ រដ្ឋបាលខេត្តរតនគិរី និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តរតនគិរី បានរៀបកិច្ចប្រជុំរវាងតំណាងអគ្គលេខាធិការដ្ឋានក្រុមប្រឹក្សាសកម្មភាពជនពិការ និងក្រុមប្រឹក្សាសកម្មភាពជនពិការខេត្តរតនគិរី ក្រោមអធិបតីភាព លោកជំទាវ ញាន ទិត្យចិន្ដា អភិបាលរង និងជាប្រធានក្រុមប្រឹក្សាសកម្មភាពជនពិការខេត្តរតនគិរី និងលោក ឈន អក្ខរា ប្រធានផ្នែកអភិវឌ្ឍសេវាពិការភាព តំណាងអគ្គលេខាធិការដ្ឋានក្រុមប្រឹក្សាសកម្មភាពជនពិការ និងមានការអញ្ជើញចូលរួមពី លោក លោកស្រី តំណាងមន្ទីរ អង្គភាព ក្រុង ស្រុក ដែលជាសមាជិកក្រុមប្រឹក្សាសកម្មភាពជនពិការខេត្តរតនគិរីចំនួន ៤២នាក់ ដែលមានស្ត្រី ១៥នាក់។
កិច្ចប្រជុំនេះរៀបចំឡើងក្នុងគោលបំណងដើម្បីស្វែងយល់អំពីវឌ្ឍនភាពការងារ និងការអនុវត្តបទដ្ឋានបច្ចេកទេស «ផាសុកវត្ថុ» នៅតាមទីសាធារណៈក្នុងខេត្តរតនគិរី ដែលមានសកម្មភាពនិងសម្រេចលទ្ធផលដូចខាងក្រោម៖
១.បង្ហាញអំពីលទ្ធផលសម្រេចបានរបស់ ក្រុមប្រឹក្សាសកម្មភាពជនពិការខេត្តរតនគិរី
២.បានផ្សព្វផ្សាយបន្ថែមអំពីលិខិតបទដ្ឋានគតិយុត្តនានា ក្នុងការលើកកម្ពស់សិទ្ធិជនមានពិការភាព
៣.រំលឹកអំពីតួនាទីភាកិច្ចនិងការចូលរួមរបស់មន្ទីរ អង្គភាព ក្រុង ស្រុក ក្នុងការគាំទ្រនិងលើកកម្ពស់សិទ្ធិជនមានពិការភាពតាមការងារជំនាញរៀងៗខ្លួន
៤.ចុះពិនិត្យការអនុវត្តបទដ្ឋានបច្ចេកទេស “ផាសុកវត្ថុ” នៅតាមទីសាធារណៈ ដូចជាផ្លូវជនមានពិការភាព ចំណត និងបន្ទប់ទឹកសាធារណៈខេត្តរតនគិរី
៥.សិក្សាអំពីបញ្ហាប្រឈមនានា និងរួមគ្នាដោះស្រាយបញ្ហាចំពោះមុខ និងទិសដៅយូរអង្វែងក្នុងការរៀបចំផាសុកវត្ថុនៅតាមទីសាធារណៈក្នុងខេត្តរតនគិរី៕
