ខេត្តព្រះសីហនុ៖ នាព្រឹកថ្ងៃទី២៥ ខែមិថុនាឆ្នាំ២០២៥ ឯកឧត្តម ម៉េត មករា រដ្ឋលេខាធិការ និងជាអនុប្រធានក្រុមប្រឹក្សាសកម្មភាពជនពិការ បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្ដីពី «សិទ្ធិទទួលបានយុត្តិធម៌សម្រាប់ជនមានពិការភាពក្នុងប្រព័ន្ធយុត្តិធម៌» សម្រាប់មន្ត្រីយុត្តិធម៌ នៅសណ្ឋាគារ Sea Breeze Villa ខេត្តព្រះសីហនុ។

វគ្គបណ្តុះបណ្តាលនេះមានរយៈពេល ២ថ្ងៃ ពីថ្ងៃទី២៥-២៦ ខែមិថុនា ឆ្នាំ២០២៥ រៀបចំដោយ ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងយុត្តិធម៌ អគ្គលេខាធិការក្រុមប្រឹក្សាសកម្មភាពជនពិការ សហការជាមួយរដ្ឋបាលខេត្តព្រះសីហនុ និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (UNOHCHR)។

វគ្គបណ្ដុះបណ្ដាលនេះមានការចូលរួមពីមន្ត្រីយុត្តិធម៌ ដែលជាចៅក្រម ព្រះរាជអាជ្ញារង ចៅក្រមកម្មសិក្សា ប្រធាន អនុប្រធានការិយាល័យ មកពីខេត្តគោលដៅ ចំនួន៥ រួមមាន ខេត្តកំពត ខេត្តកំពង់ស្ពឺ ខេត្តព្រះសីហនុ ខេត្តកោះកុង ខេត្តតាកែវ និស្សិតផ្នែកច្បាប់ អង្គការជាតិ អន្តរជាតិ និងអ្នកពាក់ព័ន្ធ សរុប ចំនួន ៤៣នាក់។

គោលបំណងនៃវគ្គបណ្តុះបណ្តាលនេះ គឺ

១-លើកកម្ពស់ការយល់ដឹងអំពីសិទ្ធិរបស់ជនមានពិការភាព ស្របតាមបទដ្ឋានសិទ្ធិមនុស្សអន្តរជាតិ និងក្របខណ្ឌគតិយុត្តិជាតិ។

២-លើកកម្ពស់ការយល់ដឹងអំពីគម្រូសិទ្ធិមនុស្សក្នុងវិស័យពិការភាព និងរបៀបអនុវត្តគម្រូសិទ្ធិមនុស្សនេះ នៅក្នុងកិច្ចការងាររបស់មន្ត្រីក្នុងប្រព័ន្ធយុត្តិធម៌។

៣-ស្វែងយល់ពីរបៀបនៃការអនុវត្តកាតព្វកិច្ចក្នុងក្របខណ្ឌច្បាប់ជាតិ និងអន្តរជាតិដើម្បីផ្តល់នូវយុត្តិធម៌ ពេលមានសំណុំរឿងទាក់ទងនឹងជនមានពិការភាព នៅក្នុងដំណើរការនីតិវិធីតុលាការ។៤-កំណត់បញ្ហា ទទួលស្គាល់ និងកាត់បន្ថយឧបសគ្គនានាដែលជនមានពិការភាពជួបប្រទះ នៅពេលពួកគេអនុវត្តសិទិ្ធរបស់ខ្លួន។

៥-កំណត់ឱកាសទាំងឡាយដើម្បីពង្រឹងកិច្ចសហប្រតិបត្តិការរវាងតួអង្គក្នុងប្រព័ន្ធយុត្តិធម៌ និងអង្គការតំណាងជនមានពិការភាព ព្រមទាំងដៃគូនានានៅថ្នាក់មូលដ្ឋាន ដើម្បីលើកកម្ពស់សិទ្ធិទទួលបានយុត្តិធម៌សម្រាប់ជនមានពិការភាព៕