បាត់ដំបង៖ ឯកឧត្តម ឯក ក្រិត រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានទទួលបន្ទុកលើការងារគណៈកម្មាធិការជាតិកម្ពុជាដើម្បីមនុស្សចាស់ នាយកដ្ឋានមនុស្សចាស់និងអតីតយុទ្ធជន និងមជ្ឈមណ្ឌលជាតិគាំពារមនុស្សវ័យចាស់ តំណាងដ៏ខ្ពង់ខ្ពស់របស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមក្នុងកម្មវិធីទស្សនកិច្ចសមាគមមនុស្សចាស់នៅភូមិសសរពកឃុំកន្ទឺ១ ស្រុកបាណន់ ខេត្តបាត់ដំបង និងបានអញ្ជើញជាអធិបតីក្នុងពិធីវេទិកាមនុស្សវ័យចាស់លើកទី៣ នៅខេត្តបាត់ដំបង ដែលរៀបចំដោយអង្គការមនុស្សចាស់កម្ពុជា នាថ្ងៃទី២៧ ខែតុលា ឆ្នាំ២០២៣។
កម្មវិធីវេទិកាមនុស្សវ័យចាស់លើកទី៣ នៅខេត្តបាត់ដំបង ដែលរៀបចំដោយអង្គការមនុស្សចាស់កម្ពុជានៅថ្ងៃសុក្រនេះតាមរយៈការចូលរួមគាំទ្រពីអង្គការយូអិនឌីភី និងអង្គការអុកស្វាម ក្រោមសហការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា មានការអញ្ជើញចូលរួមពី ឯកឧត្តមអគ្គនាយកសេវាសង្គមកិច្ច លោកជំទាវអភិបាលរងខេត្តបាត់ដំបង ប្រធាននាយកដ្ឋានមនុស្សចាស់និងអតីតយុទ្ធជន អនុប្រធាននាយកដ្ឋាននិងមន្ត្រីនាយកដ្ឋានមនុស្សចាស់និងអតីតយុទ្ធជន តំណាងមន្ទីរ ស.អ.យ. ១០ រាជធានី ខេត្ត អង្គការដៃគូរពាក់ព័ន្ធ និងតំណាងមនុស្សចាស់ទូទាំង ២៥ រាជធានី ខេត្ត ដែលមានអ្នកចូលរួមសរុប ៣៤៨នាក់។
កម្មវិធីទស្សនកិច្ចសមាគមមនុស្សចាស់ និងវេទិកាមនុស្សវ័យចាស់លើកទី៣នេះ រៀបចំឡើងក្នុងគោលបំណងស្វែងយល់អំពីដំណើរការនិងការប្រព្រឹត្តិទៅរបស់សមាគមមនុស្សចាស់ ដែលជាយន្តការមួយបានចូលរួមចំណែកក្នុងកិច្ចគាំពារសង្គមនៅមូលដ្ឋាន ព្រមទាំងបង្កើនការយល់ដឹងរបស់មនុស្សចាស់អំពីកិច្ចអន្តរាគមន៍សំខាន់ៗនិងវឌ្ឍនភាពនានារបស់រាជរដ្ឋាភិបាលក្នុងកិច្ចគាំពារនិងលើកកម្ពស់សុខុមាលភាពដល់មនុស្សវ័យចាស់នៅកម្ពុជាស្របទៅតាមទិសដៅនិងផែនការយុទ្ធសាស្រ្តនៃគោលនយោបាយជាតិស្តីពីមនុស្សវ័យចាស់ឆ្នាំ២០១៧-២០៣០៕
