មណ្ឌលអប់រំកែប្រែទី២ រាជធានីភ្នំពេញ៖ នាព្រឹកថ្ងៃព្រហស្បតិ៍ ថ្ងៃទី២៨ ខែសីហា ឆ្នាំ២០២៥ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន ព្រមទាំងថ្នាក់ដឹកនាំក្រសួង ស.អ.យ. រួមជាមួយឯកឧត្តមឧត្តមអគ្គានុរក្ស ថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ និងលោកជំទាវ ព្រមទាំងថ្នាក់ដឹកនាំអគ្គនាយកដ្ឋានពន្ធនាគារ ក្រសួងមហាផ្ទៃ បានជួបសំណេះសំណាលសួរសុខទុក្ខ បងប្អូនជនជាប់ឃុំជាស្ត្រីមានផ្ទៃពោះ និងកូនតាមម្ដាយអាយុក្រោម ២ឆ្នាំ ដែលកំពុងទទួលផលពីការអនុវត្តកម្មវិធីឧបត្ថម្ភសាច់ប្រាក់ជូនជនជាប់ឃុំជាស្ត្រីមានផ្ទៃពោះ និងកូនអាយុក្រោម ២ឆ្នាំ តាមម្ដាយក្នុងពន្ធនាគារ។
កម្មវិធីឧបត្ថម្ភសាច់ប្រាក់ជូនជនជាប់ឃុំជាស្រ្តីមានផ្ទៃពោះ និងកូនអាយុក្រោម ២ឆ្នាំតាមម្តាយនៅក្នុងពន្ធនាគារគឺជាការគិតគូររបស់រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជា ក្នុងការលើកកម្ពស់សុខុមាលភាពមាតានិងទារក ដោះស្រាយបញ្ហាកង្វះអាហារូបត្ថម្ភចាប់ពីនៅក្នុងផ្ទៃដល់កុមារអាយុ២ឆ្នាំ ដើម្បីជម្រុញការលូតលាស់កាយសម្បទានិងបញ្ញាស្មារតី។ បើទោះបីជាម្តាយត្រូវជាប់ពិរុទ្ធក៏ដោយ តែទារកនៅក្នុងផ្ទៃ និងកូនតាមម្តាយនៅក្នុងពន្ធនាគារ ពុំមានកំហុសនោះទេ ហើយស្រ្តីជាម្តាយកំពុងជាប់ពិរុទ្ធ ក៏ត្រូវទទួលបានការគិតគូរចំពោះសុខភាពផងដែរ តាមរយៈ ផ្តល់ការគាំពារប្រកបដោយសមធម៌ និងបរិយាបន្ន ស្របតាមគោលការណ៍ «មិនបោះបង់ពលរដ្ឋណាម្នាក់»។
សូមជម្រាបថា កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំនេះ គឺជាគំនិតផ្តួចផ្តើម របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា នៃព្រះរាជាណាចក្រកម្ពុជា ដោយបានដាក់ឱ្យអនុវត្តតាំងពីឆ្នាំ២០១៩មក និងបានបន្តពង្រីកវិសាលភាព និងអត្រាប្រាក់ឧបត្ថម្ភ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។ រហូតមកដល់ពេលនេះ មានស្ត្រីមានផ្ទៃពោះនិងកុមារអាយុក្រោម២ឆ្នាំចំនួន ១៦១ ៥៤២នាក់ គិតជាដោយឡែកស្ត្រីជាប់ឃុំមានចំនួន១៣១នាក់ និងកុមារតាមម្តាយអាយុក្រោម២ឆ្នាំ ចំនួន៨១នាក់ បានទទួលផលពីកម្មវិធីឧបត្ថម្ភសាច់ប្រាក់របស់រាជរដ្ឋាភិបាល។
