ដោយទទួលបានការអនុញ្ញាតិដ៏ខ្ពង់ខ្ពស់ពីឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ ព្រឹកថ្ងៃទី២៨ ខែតុលា ឆ្នាំ២០២៤នេះ នៅទីស្តីការក្រសួងមហាផ្ទៃ ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ បានអញ្ជើញចូលរួមកិច្ចប្រជុំពិនិត្យ ផ្ទៀងផ្ទាត់ និងឯកភាពលើសូចនាករចំនួន៨ នៃផែនការយុទ្ធសាស្រ្តជាតិស្តីពិការភាព ២០២៤-២០២៨ ដែលក្រសួងមហាផ្ទៃត្រូវអនុវត្ត។
កិច្ចប្រជុំនេះដឹកនាំដោយឯកឧត្តម យុន ឈុន្នី រដ្ឋលេខាធិការ អនុប្រធានក្រុមប្រឹក្សាសកម្មភាព ជនពិការ និងជាប្រធានក្រុមការងារសកម្មភាពជនពិការក្រសួងមហាផ្ទៃ ដែលមានសមាជិក សមាជិកាមកពីអគ្គនាយកដ្ឋាន និងអង្គភាពនានាក្រោមឱវាទក្រសួងមហាផ្ទៃ អភិបាលរងរាជធានី ខេត្តទាំង២៥ សរុបចំនួន៥០នាក់។
សូមជម្រាបជូនថា ផែនការយុទ្ធសាស្រ្តជាតិស្តីពីពិការភាព ២០២៤-២០២៨ គឺមានសូចនាករ ចំនួន៨ ដែលបានរៀបចំដោយអន្តរក្រសួងគ្រប់ក្រសួងស្ថាប័ន។ ផែនការនេះនឹងត្រូវប្រកាសដាក់ ឱ្យអនុវត្តនៅក្នុងឱកាសទិវាជនមានពិការភាពថ្ងៃទី៣ ខែធ្នូ ឆ្នាំ២០២៤ខាងមុខ ហើយ ចំពោះសូចនាករចំនួន៨នោះរួមមាន÷
ការជ្រើសរើសជនមានពិការភាពចូលបម្រើការងារ,ផ្តល់ឱកាសឱ្យជនមានពិការភាពចូលរួមក្នុងការកសាង អនុវត្ត និងវាយតម្លៃកម្មវិធីវិនិយោគ, ផ្តល់សិទ្ធិអំណាចដល់ជនមានពិការភាពបានចូលជាសមាជិក និងបានចូលរួមកិច្ចប្រជុំគណ:កម្មាធិការទទួលបន្ទុកកិច្ចការ នារី និងកុមារ, ការទទួល និងដោះស្រាយវិវាទក្រៅប្រព័ន្ធតុលាកា, ការផ្តល់សេវាសាធារណ:នៅតាមច្រកចេញចូលតែមួយ, ការរៀបចំឱ្យមានផាសុកវត្ថុនៅតាមអគារ និងទីធ្លាសាធារណៈ។ល។ សំដៅរួមចំណែកក្នុងការអនុវត្តផែនការយុទ្ធសាស្រ្តជាតិស្តីពីពិការភាព ២០២៤-២០២៨ ឱ្យមានប្រសិទ្ធភាព និងស័ក្តិសិទ្ធិភាព៕
