ខេត្តបន្ទាយមានជ័យ៖ នៅរសៀលថ្ងៃចន្ទ ៩ រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី ២៩ ខែកក្កដា ឆ្នាំ២០២៤ មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តបន្ទាយមានជ័យ បានសហការជាមួយ អង្គការកុមារមេគង្គ អាជ្ញាធរ បាននាំយកអំណោយ ជូនដល់គ្រួសារក្រីក្រចំនួន ១គ្រួសារ បច្ចុប្បន្នរស់នៅជាមួយបងស្រីបង្កើត នៅភូមិដីឡូតិ៍ សង្កាត់ទឹកថ្លា ក្រុងសិរីសោភ័ណ ដោយមានជីវភាពលំបាក មានកូនច្រើនក្នុងបន្ទុក គាត់បានដើរសុំទានដើម្បីយកលុយទៅទិញទឹកដោះគោចិញ្ចឹមកូនភ្លោះ ២នាក់ អាយុ៤ខែ ។ សមាជិកគ្រួសារមានចំនួន ១២នាក់ រួមមាន ម្តាយឈ្មោះ ស៊ុយ កឹង អាយុ ៤១ឆ្នាំ គ្មានមុខរបរ ឪពុកឈ្មោះ អាន សារិម អាយុ ៤៥ឆ្នាំ មុខរបរ មិនពិតប្រាកដ មានកូនចំនួន ១០នាក់ ស្រី ៦នាក់ ។
នាឱកាសនោះបានផ្តល់អង្ករចំនួន ២ការ៉ុង ស្មើនឹង ៥០គីឡូក្រាម ទឹកត្រី ២យួរ ទឹកស៊ីអ៊ីវ ២យួរ មី ២កេស ត្រីខ ២យួរ និងទឹកដោះគោ ៦ កំប៉ុងធំផ្តល់ជូនជារៀងរាល់ខែ ក្នុងនោះ លោក ឆាវ រ៉ាត់ អនុប្រធានមន្ទីរបានផ្តល់ថវិកាផ្ទាល់ខ្លួនចំនួន ១៥ម៉ឺនរៀល។ មន្ទីរក៏បានធ្វើការស្នើសុំអោយឃុំ ធ្វើបណ្ណក្រីក្រជូនគាត់ផងដែរ។
