ព្រៃវែង៖ ថ្ងៃពុធ ទី១១ ខែតុលា ឆ្នាំ២០២៣ ឯកឧត្តម សន សុផល អគ្គនាយកនៃអគ្គនាយកដ្ឋានស្តារសម្បទា ក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតី ក្នុងពិធីបើកផ្តល់របបគោលនយោបាយជូនចំពោះជនពិការក្រីក្រនៅតាមសហគមន៍ ស្រុកព្រះស្តេច ខេត្តព្រៃវែង សរុបចំនួន ២៣៤នាក់។
ពិធីនេះរៀបចំឡើងនៅសាលាស្រុកព្រះស្តេច ដោយមានការចូលរួមពីលោក សាន់ រតនា ប្រធាននាយកដ្ឋានសុខុមាលភាពជនពិការ នៃក្រសួងសង្គមកិច្ច លោក ហ៊ុន ណេត ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រៃវែង លោកអភិបាលស្រុក លោកមេឃុំ និងបងប្អូនមានពិការភាពសរុបចំនួន ២៧៥នាក់។
ឯកឧត្តម សន សុផល ក៏បានផ្តាំផ្ញេីដល់លោកមេឃុំ លោកអភិបាលស្រុក និងលោកប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ឱ្យយកចិត្តទុកដាក់ខ្ពស់ដល់ជនមានពិការភាពនៅពេលមានគ្រោះធម្មជាតិដែលកេីតឡេីងជាយថាហេតុ ដូចជាទឹកជំនន់ត្រូវជម្លៀសពួកគាត់ស្វែងរកទីសុវត្ថិភាពអោយបានទាន់ពេលវេលា និងស្នេីសុំឱ្យអជ្ញាធរពាក់ព័ន្ធជួយជំរុញការកំណត់អត្តសញ្ញាណកម្មជនពិការសម្រាប់ទទួលបណ្ណសំគាល់ជនមានពិការភាព ដេីម្បីឱ្យជនមានពិការភាពអាចទទួលបានអត្ថប្រយោជន៍ផ្សេងៗឆ្លើយតបនឹងតម្រូវការរបស់ពួកគេ។
គូសបញ្ជាក់ផងដែរថា នៅទូទាំងខេត្តព្រៃវែង មានជនពិការភាពចំនួន ២ ៦០៧នាក់ ដែលទទួលបាន របបគោលនយោបាយជូនចំពោះជនពិការក្រីក្រនៅតាមសហគមន៍៕
