ភ្នំពេញ៖ ថ្ងៃព្រហស្បតិ៍ ថ្ងៃទី២៦ ខែតុលា ឆ្នាំ២០២៣ ឯកឧត្តម ឌីន បូរី អគ្គនាយក នៃអគ្គនាយកដ្ឋានសេវាសង្គមកិច្ច ក្រសួងសង្គមកិច្ច អតីតយុទ្ធជន និងយុវនីតិសម្បទា បានចូលរួមជាអធិបតីក្នុងពិធីបើកកិច្ចប្រជុំអង្គការដៃគូលើកទី២២ របស់គម្រោងថែទាំកុមារក្នុងគ្រួសារជាអាទិភាពចម្បង (FCF) នៃអង្គការ Save the Children ដែលមានការចូលរួមពីក្រសួង ស្ថាប័ន និងអង្គការដៃគូពាក់ព័ន្ធ ព្រមទាំងគណៈកម្មាធិការពិគ្រោះយោបល់កិច្ចការស្ត្រី និងកុមារ និងមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី ខេត្តគោលដៅចំនួន៩ រួមមាន រាជធានីភ្នំពេញ ខេត្តកណ្តាល កំពត កំពង់ធំ កំពង់ស្ពឺ កំពង់ឆ្នាំង បន្ទាយមានជ័យ បាត់ដំបង និងខេត្តសៀមរាប។

កិច្ចប្រជុំដៃគូលើកទី២២ នៃគម្រោងថែទាំកុមារក្នុងគ្រួសារជាអាទិភាពចម្បង (FCF) ត្រូវបានរៀបចំឡើងដើម្បីចែករំលែកការរៀនសូត្រ និងធ្វើបច្ចុប្បន្នភាពដោយផ្តោតជាសំខាន់លើវឌ្ឍនភាព គម្រោងក្នុងចំណោមអង្គការសមាជិកនៅថ្នាក់ជាតិ និងថ្នាក់ក្រោមជាតិ ក៏ដូចជាតំណាងក្រសួង ស្ថាប័នពាក់ព័ន្ធនៅសណ្ឋាគារហ៊ីមាវ៉ារី រាជធានីភ្នំពេញ។

សូមបញ្ជាក់ថា គម្រោងថែទាំកុមារក្នុងគ្រួសារជាអាទិភាពចម្បង (FCF) បានចាប់ផ្តើមអនុវត្តនៅឆ្នាំ២០១៥ រហូតដល់ដំណាច់ខែធ្នូ ឆ្នាំ២០២៣ និងបន្តរហូតដល់ឆ្នាំ២០២៥ ក្រោមការគាំទ្រពីទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID)៕