កំពង់ចាម÷ នៅព្រឹកថ្ងៃទី១៥ ខែវិច្ឆិកា ឆ្នាំ២០២៣ ក្រុមប្រឹក្សាសកម្មភាពជនពិការខេត្តកំពង់ចាម បានរៀបចំកិច្ចប្រជុំ ស្តីពីលទ្ធផលសម្រេចបានប្រចាំត្រីមាសទី៣ និងលើកទិសដៅអនុវត្តបន្ត និងពិធីចែកប័ណ្ណសម្គាល់ពិការភាពជូនរដ្ឋបាលក្រុង ស្រុក ក្រោមអធិបតីភាពលោកជំទាវ ប៉ាង ដានី អភិបាលរងនៃគណៈអភិបាលខេត្ត និងជាប្រធានក្រុមប្រឹក្សាសកម្មភាពជនពិការខេត្ត ព្រមទាំងលោក លោកស្រីជាអនុប្រធាន សមាជិក សមាជិកា និងក្រុមលេខាធិការដ្ឋាននៃក្រុមប្រឹក្សាសកម្មភាពជនពិការខេត្ត និងលោក លោកស្រី ប្រធាន និងអនុប្រធានការិយាល័យសង្គមកិច្ចក្រុង ស្រុក ទាំង១០ សរុបចំនួន ៦០នាក់។
កិច្ចប្រជុំនេះ រៀបចំឡើងក្នុងគោលបំណងចំនួន ៤គឺ ទី១. បូកសរុបលទ្ធផលសម្រេចបានប្រចាំត្រីមាសទី៣ ឆ្នាំ២០២៣ ទី២. ពិភាក្សាលើបញ្ហាប្រឈម និងលើកទិសដៅអនុវត្តបន្ត ទី៣. ពិភាក្សាលើសំណូមពររបស់ជនមានពិការភាព ចំនួន៣២ ដែលបានលើកឡើងក្នុងវេទិកាសាធារណៈ រវាងជនមានពិការភាព អាជ្ញាធរមូលដ្ឋាន និងរោងចក្រ សហគ្រាស ក្នុងស្រុកព្រៃឈរ ជើងព្រៃ និងបាធាយ កាលពីថ្ងៃទី២០ ខែតុលា ឆ្នាំ២០២៣ និងទី៤. ចែកប័ណ្ណសម្គាល់ពិការភាពចំនួន ១១ ៦៨៩បណ្ណ ជូនរដ្ឋបាលក្រុង ស្រុក ដើម្បីចែកបន្តដល់ឃុំ សង្កាត់ ភូមិ និងដល់ដៃជនមានពិការភាពដែលបានសម្ភាសកំណត់អត្តសញ្ញាណកម្មដោយមន្ត្រីកាន់កម្មវិធីឃុំ សង្កាត់ ក្នុងកម្មវិធីកំណត់អត្តសញ្ញាណកម្មពិការភាព និងសិទ្ធិជាមូលដ្ឋាន ព្រមទាំងយន្តការតាមដាន និងត្រួតពិនិត្យ៕