រាជធានីភ្នំពេញ÷ ថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០២៣ នាយកដ្ឋានកិច្ចការពារកុមារ បានរៀបចំពិធីអបអរសាទរប្រគល់វិញ្ញាបនបត្រទទួលស្គាល់មណ្ឌលថែទាំកុមារ ក្រោមអធីបតីភាព ឯកឧត្តម ឌីន បូរី អគ្គនាយកសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា។

មណ្ឌលថែទាំកុមារសរុបចំនួន១៦ របស់អង្គការ សមាគម ដៃគូចំនួន១២ ដែលបានបំពេញគ្រប់លក្ខខណ្ឌ និងទម្រង់បែបបទនៃការស្នើសុំការអនុញ្ញាតបង្កើតមណ្ឌលថែទាំកុមារ ដែលក្រសួងសង្គមកិច្ច អតីតយុទ្ធជន និងយុវនីតិសម្បទា បានសម្រេចផ្តល់វិញ្ញាបនបត្រទទួលស្គាល់ជាមណ្ឌលថែទាំកុមារ និងប្រគល់ជូននាឱកាសនេះមាន ១.អង្គការដើម្បីភាពញញឹមនៃកុមារ (PSE) ២.អង្គការបំរើដើមឈើសេវាសង្គមដើមឈើសប្បាយ ៣.អង្គការគ្រួសារថ្មី ៤.អង្គការខេខេអ៊ីវី កម្ពុជា ៥.អង្គការ World Mobilization ៦.សមាគមក្តីសង្ឃឹមរបស់ជនក្រីក្រ ៧.អង្គការមូលនិធិនៃក្តីសង្ឃឹម (Operation Hope Foundation) ៨.អង្គការបេះដូងតូច ៩.អង្គការតំណក់ទឹក ១០.អង្គការបេសកកម្មជីវិតថ្មី ១១.អង្គការបណ្ដាញកុមារឥតព្រំដែនកម្ពុជា ១២.អង្គការ Friends International។

ឯកឧត្តមអគ្គនាយកក៏បានបញ្ជាក់ផងដែរថា ការផ្តល់ការអនុញ្ញាតឱ្យបើកមណ្ឌលដំណើរការថែទាំកុមារ គឺមានតែក្រសួងសង្គមកិច្ច អតីតយុទ្ធជន និងយុវនីតិសម្បទា តែមួយគត់ដែលជាស្ថាប័នសមត្ថកិច្ច ហើយមណ្ឌលថែទាំមិនបានទួលស្គាល់ទេ គឺមណ្ឌលថែទាំនោះជាមណ្ឌលខុសច្បាប់។

សូមបញ្ជាក់ថា សារៈសំខាន់នៃការផ្តល់វិញ្ញាបនបត្រទទួលស្គាល់មណ្ឌល រួមមាន ១.ទប់ស្កាត់ការបើកមណ្ឌលដែលគ្មានគុណភាព និងអាណាធិបតេយ្យ ២.ទប់ស្កាត់ការរំលោភបំពានកុមារ ៣.ទប់ស្កាត់ការប្រើប្រាស់ពលកម្មកុមារ ៤.អាចត្រួតពិនិត្យបាននូវឥរិយាបថរបស់អ្នកថែទាំកុមារ និងទី៥.គ្រប់គ្រងបាននូវប្រភពហិរញ្ញវត្ថុរបស់អង្គការ៕