ភ្នំពេញ÷ នៅព្រឹកថ្ងៃទី១៣ ខែធ្នូ ឆ្នាំ២០២៣ ឯកឧត្តម នុត សាអាន ប្រធានគណៈកម្មាធិការជាតិប្រឆាំងទារុណកម្មនិងប្រតិភូ ចុះពិនិត្យមណ្ឌលសំចតសង្គមកិច្ចរាជធានីភ្នំពេញ (ព្រៃស្ពឺ) ដើម្បីផ្សព្វផ្សាយលិខិតបទដ្ឋានគតិយុត្តិជាតិ ពាក់ព័ន្ធនឹងការធ្វើទារុណកម្ម និងការចុះអង្កេតត្រួតពិនិត្យពន្ធនាគារ និងកន្លែងឃុំឃាំងបណ្ដោះអាសន្ននានានៅតាមរាជធានី-ខេត្ត ដោយមិនផ្ដល់ដំណឹងទុកជាមុនរបស់គណៈកម្មការជាតិប្រឆាំងទារុណកម្មអំពើឃោរឃៅ អំពើអមនុស្សធម៌ អំពើធ្វើទុក្ខបុកម្នេញ ឬទណ្ឌកម្ម។

ក្នុងដំណើរមកដល់របស់ឯកឧត្តមប្រធាននិងប្រតិភូអម បានធ្វើការវាយតម្លៃខ្ពស់ចំពោះការខិតខំប្រឹងប្រែងអនុវត្តនូវតួនាទីភារកិច្ចរបស់បុគ្គលិកមន្ត្រីរាជការនៅក្នុងមជ្ឈមណ្ឌលព្រមទាំងការថែទាំរបស់ក្រុមគ្រូពេទ្យចំពោះជនរងគ្រោះជនងាយរងគ្រោះដែលជាជនអនាថា ការយកចិត្តទុកដាក់សរសើរទៅលើការដឹកនាំ និងបរិស្ថានរស់នៅល្អប្រកបដោយផាសុខភាពនៅក្នុងមណ្ឌលផងដែរ៕