ទីស្តីការក្រសួង ៖ ថ្ងៃទី០៣ ខែមេសា ឆ្នាំ២០២៤ ឯកឧត្តម ទៀវ សុគន្ធ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញជាអធិបតីក្នុងពិធីបិទសិក្ខាសាលាពិគ្រោះយោបល់លើសេចក្តីព្រាងទី១ នៃផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨ ដោយមានសមាសភាពចូលរួមសិក្ខាសាលារួមមាន ឯកឧត្តម លោកជំទាវ លោក លោកស្រី ជាប្រធានអង្គភាព ប្រធានមន្ទីរ ប្រធានសាខាមូលនិធិជាតិជំនួយសង្គម និងអង្គការដៃគូ អភិវឌ្ឍសរុបចំនួន១៣៣នាក់ ស្រី៣៦នាក់ ។
គោលបំណងនៃសិក្ខាសាលានេះ គឺដើម្បីពិនិត្យ កែសម្រួល និងទទួលធាតុចូលបន្ថែម ពីគ្រប់ភាគីពាក់ព័ន្ធ លើសេចក្តីព្រាងទី១ នៃផែនការយុទ្ធសាស្ត្រអភិវឌ្ឍន៍វិស័យវិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨។
ជាលទ្ធផលតាមរយៈសិក្ខាសាលារយៈពេល២ថ្ងៃ អង្គសិក្ខាសាលាបានវាយតម្លៃខ្ពស់ចំពោះសេចក្តីព្រាងទី១ នៃផែនការយុទ្ធសាស្ត្រអភិវឌ្ឍន៍វិស័យសង្គមកិច្ច អតីតយុទ្ធជន និងយុវនីតិសម្បទា ២០២៤-២០២៨ ដោយទទួលបានការឯកភាពស្ទើរតែទាំងស្រុងទៅលើសេចក្តីព្រាងទី១នេះ និងតាមរយៈការបែងចែកក្រុមពិភាក្សាទទួលបានលទ្ធផលមានដូចតទៅ៖
១. ពិនិត្យអំពីចក្ខុវិស័យដែលបានស្នើឡើងនៅជម្រើសថ្មីៗមួយចំនួនទៀត សម្រាប់ដាក់ជូនថ្នាក់ដឹកនាំសម្រេច។
២. កែសម្រួលបេសកកម្ម និងគោលបំណងឱ្យសមស្របទៅនឹងស្ថានភាពវិវត្តន៍នៃវិស័យសង្គមកិច្ច ក៏ដូចជាមុខងារភារកិច្ចរបស់វិស័យ។
៣. បានកែសម្រួល និងផ្តល់មតិយោបល់បន្ថែម តាមកម្មវិធី អនុកម្មវិធី ចង្កោមសកម្មភាព និងសូចនាករ ក្នុងតារាងលទ្ធផលរំពឹងទុក។
៤. កម្មវិធីទី៣បានស្នើសូចនាករថ្មីមួយចំនួនសម្រាប់ដាក់បញ្ចូលទៅក្នុងបញ្ជីសូចនាករសម្រាប់ការតាមដានលទ្ធផលការងាររយៈពេល៥ឆ្នាំ ២០២៤-២០២៨។
៥. អង្គសិក្ខាសាលាក៏បានឯកភាពគ្នាក្នុងការផ្តល់ធាតុចូល ដោយមានការឆ្លងយោបល់ឯកភាពពីថ្នាក់ដឹកនាំទទួលបន្ទុកអង្គភាពរបស់ខ្លួន និងបញ្ជូនមកនាយកដ្ឋានផែនការ ស្ថិតិ និងសរុប យ៉ាងយូរត្រឹមថ្ងៃទី២៥ ខែមេសា ឆ្នាំ២០២៤។
