រាជធានីភ្នំពេញ ៖ នាថ្ងៃទី១៥ ខែឧសភា ឆ្នាំ២០២៥ ឯកឧត្តម តូច ចាន់នី រដ្ឋលេខាធិការ, ឯកឧត្តម នួម សុខុន អនុរដ្ឋលេខាធិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញចូលរួមជាគណៈអធិបតីក្នុងពិធីបើក-បិទសិក្ខាសាលាផ្សព្វផ្សាយស្តីពីការដាក់ឱ្យអនុវត្តភាពជាដៃគូរវាងរាជរដ្ឋាភិបាលកម្ពុជា និងអង្គការយូនីសេហ្វក្នុងការលើកកម្ពស់អភិបាលកិច្ចរដ្ឋបាលថ្នាក់ក្រោមជាតិ ក្រោមអធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅសណ្ឋាគារសុខាភ្នំពេញ រាជធានីភ្នំពេញ។
កម្មវិធីបិទសិក្ខាសាលាបានប្រព្រឹត្តិទៅក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា។
សិក្ខាសាលាបានធ្វើឡើងក្នុងគោលបំណង ដើម្បីឱ្យគ្រប់ភាគីពាក់ព័ន្ធមានការយល់ដឹងឱ្យកាន់តែច្បាស់លាស់ និងគ្រប់ជ្រុងជ្រោយអំពីការលើកកម្ពស់អភិបាលកិច្ចរដ្ឋបាលថ្នាក់ក្រោមជាតិ ដែលនឹងត្រូវអនុវត្តក្រោមផែនការសកម្មភាព និងថវិការយៈពេល២ឆ្នាំ (២០២៤-២០២៥) ប្រព្រឹត្តទៅដោយរលូន និងទទួលបានជោគជ័យតាមការគ្រោងទុក។
សូមជម្រាបថា ដើម្បីរួមចំណែកលើកកម្ពស់កំណែទម្រង់វិមជ្ឈការ និងវិសហមជ្ឈការនៅកម្ពុជា អង្គការយូនីសេហ្វ ប្រចាំប្រទេសកម្ពុជាបានចុះអនុស្សរណៈនៃកិច្ចព្រមព្រៀងអនុវត្តផែនការសកម្មភាព និងថវិការយៈពេល ២ឆ្នាំ សម្រាប់ឆ្នាំ២០២៤-២០២៥ ជាមួយក្រសួងមហាផ្ទៃ ក្រសួងពាក់ព័ន្ធ និងអង្គការយូនីសេហ្វ សំដៅលើកកម្ពស់ ប្រសិទ្ធភាពនៃការផ្ទេរមុខងារ និងធនធានដល់រដ្ឋបាលថ្នាក់ក្រោមជាតិ ដើម្បីឱ្យរដ្ឋបាលថ្នាក់ក្រោមជាតិអាចផ្តល់ សេវាសាធារណៈប្រកបដោយបរិយាបន្ន តម្លាភាព ស័ក្តិសិទ្ធិភាព ប្រសិទ្ធភាព និងឆ្លើយតបតម្រូវការរបស់ប្រជាពលរដ្ឋ។
