ទីស្ដីការក្រសួង ៖ នាព្រឹកថ្ងៃទី៧ ខែមិថុនា ឆ្នាំ២០២៤ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ បានអញ្ជើញជាអធិបតីដ៏ខ្ពង់ខ្ពស់ជាសាក្សីក្នុងពិធីចុះហត្ថលេខាលើអនុស្សារណៈនៃការយោគយល់រវាងក្រុមប្រឹក្សាសកម្មភាពជនពិការ និងកម្មវិធីអភិវឌ្ឍន៍សហប្រជាជាតិ (UNDP)។
ការចុះហត្ថលេខាលើអនុស្សារណៈនៃការយោគយល់គ្នានេះបានធ្វើឡើងដោយឯកឧត្តម ម៉េត មករា រដ្ឋលេខាធិការក្រសួង ស.អ.យ. និងជាអនុប្រធានក្រុមប្រឹក្សាសកម្មភាពជនពិការ និងលោកស្រី អាលីហ្សា ឆាកឃ័រ ប្រធាន UNDP ។
គួរបញ្ជាក់ដែរថា ក្នុងរយៈពេល៣ឆ្នាំទៅមុខទៀតនេះ UNDP បន្តគាំទ្ររាជរដ្ឋាភិបាលកម្ពុជាក្នុងការ (១). កសាង កែសម្រួល និងជំរុញការអនុវត្តលិខិតបទដ្ឋានជាតិ និងអន្តរជាតិដែលពាក់ព័ន្ធនឹងការងារពិការភាពនៅកម្ពុជា (២). កែទម្រង់ និងអភិវឌ្ឍសមត្ថភាពប្រព័ន្ធ និងយន្តការនានារបស់ក្រុមប្រឹក្សាសកម្មភាពជនពិការ។
