ខេត្តតាកែវ ៖ ថ្ងៃទី៩ ខែកក្កដា ឆ្នាំ២០២៤ ក្រោមការណែនាំពីឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា
មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តតាកែវ បានសហការជាមួយរដ្ឋបាលស្រុកត្រាំកក់ រដ្ឋបាលឃុំអង្គតាសោម និងអាជ្ញាធរភូមិ បានជួយសង្រ្គោះទារកម្នាក់ដែលត្រូវបានឪពុកម្តាយបង្កើតបោះបង់ចោល នៅវេលាម៉ោង១០ព្រឹក នៅផ្សារអង្គតាសោម។
ទារកនេះ ត្រូវបានទុកដាក់ក្នុងការថែទាំ និងរក្សាការពារបណ្តោះអាសន្នជាមួយគ្រួសារធម៌ នៅក្នុងសហគមន៍ ស្របតាមនីតិវិធី និងគោលការណ៍នៃការថែទាំជំនួសចំពោះកុមារ។
យ៉ាងណាក៏ដោយ មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តតាកែវ នឹងសហការជាមួយការិយាល័យសង្គមកិច្ច និងសុខុមាលភាពសង្គមនៃរដ្ឋបាលស្រុកត្រាំកក់ រដ្ឋបាលឃុំអង្គតាសោម ដើម្បីប្រកាសស្វែងរកឪពុកម្តាយបង្កើត និងគ្រួសារសាច់ញាតិ មុននឹងសម្រេចទុកដាក់ជាផ្លូវការក្នុងការថែទាំដោយគ្រួសារធម៌ និងឈានទៅទុកដាក់ជាអចិន្ត្រៃយ៍តាមរយៈស្មុំកូន។
ក្នុងឱកាសនេះដែរ ក្រសួងសង្គមកិច្ចអតីតយុទ្ធជន និងយុវនីតិសម្បទា សូមថ្លែងអំណរគុណដល់អាជ្ញាធរមានសមត្ថកិច្ចគ្រប់លំដាប់ថ្នាក់ និងប្រជាពលរដ្ឋ ដែលផ្តល់ព័ត៌មាន និងជួយសង្គ្រោះទារកបោះបង់ ដែលបង្ហាញអំពីគុណធម៌ ការសាមគ្គី ការអាណិតអាសូរ ក្តីស្រឡាញ់ និងកិច្ចការពារកុមារ។
ជាចុងក្រោយ ក្រសួងសង្គមកិច្ច អតីតយុទ្ធជន និងយុវនីតិសម្បទា សូមធ្វើការអំពាវនាវដល់គ្រប់ឪពុកម្តាយ អាព្យាបាល ត្រូវផ្តល់ក្តីស្រឡាញ់ និងចិញ្ចឹមបីបាច់កូនរបស់ខ្លួនប្រកដោយការទទួលខុសត្រូវ។ ក្រសួងក៏សូមអំពាវនាវផងដែរដល់ប្រជាពលរដ្ឋ ប្រសិនបានឃើញករណីទារក ឬកុមារបោះបង់ សូមរាយការណ៍ទៅស្ថាប័នមានសមត្ថកិច្ច ឬអាជ្ញាធរមូលដ្ឋាននៅជិតបំផុត ដើម្បីសង្គ្រោះបានទាន់ពេលវេលា។
