ខេត្តបន្ទាយមានជ័យ៖ នាព្រឹកថ្ងៃទី២១ ខែសីហា ឆ្នាំ២០២៤ នៅមន្ទីរសង្គមកិច្ចអតីតយុទ្ធជន និងយុវនីតិសម្បទា ខេត្តបន្ទាយមានជ័យ បានរៀបចំពិធីប្រកាសសមាសភាពសាខាមូលនិធិជាតិជំនួយសង្គម ខេត្ត និងជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរ ស.អ.យ សាខាមូលនិធិជាតិជំនួយសង្គម និងសាខាមូលនិធិជនពិការខេត្ត ក្រោមអធិបតីភាពដ៏ខ្ពង់ខ្ពស់ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការអញ្ជើញចូលរួមជាគណ:អធិបតី ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណ:អភិបាលខេត្ត ឯកឧត្តម លោកជំទាវថ្នាក់ដឹកនាំក្រសួង ស.អ.យ. និងមានការចូលរួមពីលោក លោកស្រីថ្នាក់ដឹកនាំ និងមន្ត្រីនៃមន្ទីរ ស.អ.យ. ខេត្ត ព្រមទាំងអភិបាលក្រុង ស្រុកនិងតំណាងមន្ទីរជំនាញពាក់ព័ន្ធជុំវិញខេត្តផងដែរ ។
ក្រោយពីលោក ឃុន វុទ្ធី ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទា ខេត្ត បានរាយការណ៍ជូនដល់គណ:ធិបតី និងអង្គពិធី អំពីស្ថានភាព និងសមិទ្ធផលដែលមន្ទីរសម្រេចបាន ប្រធានសាខាមូលនិធិជាតិជំនួយសង្គមខេត្តដែលទើបត្រូវបានប្រកាសចូលកាន់មុខតំណែង បានឡើងថ្លែងអំណរគុណឯកឧត្តម រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ដែលមានជំនឿជឿជាក់ ទុកចិត្ត និងបានធ្វើការប្តេជ្ញាចិត្តក្នុងការបំពេញមុខងារ និងតួនាទីភារកិច្ចដែលក្រសួងប្រគល់ជូន។ ក្នុងឱកាសនោះឯកឧត្តម ជា សុមេធី រដ្ឋមន្ត្រីក្រសួងសង្គមកិច្ចអតីតយុទ្ធជន និង យុវនីតិសម្បទា បានមានប្រសាសន៍ សម្តែងការអបអរសាទរចំពោះប្រធានសាខាមូលនិធិជាតិជំនួយសង្គមខេត្ត ទើបត្រូវបានប្រកាសចូលកាន់មុខតំណែង និងបានសម្តែងការកោតសសើរដល់ថ្នាក់ដឹកនាំ និងមន្ត្រីក្រោមឱវាទទាំងអស់ ដែលបានខិតខំប្រឹងប្រែងបំពេញការងារ និងមានសហការល្អជាមួយអង្គភាពពាក់ព័ន្ធ ពិសេសរដ្ឋបាលខេត្ត និងអង្កការដៃគូ ក្នុងការសម្រេចបានសមិទ្ធផលដ៏ល្អប្រសើរ និងគួរជាទីមោទន:កន្លងមក៕
