ព្រឹកថ្ងៃទី៣០ ខែតុលា ឆ្នាំ២០២៤នេះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីត យុទ្ធជន និងយុវនីតិសម្បទា បានអញ្ជើញចូលរួមក្នុងមិទ្ទិញមហាជនអបអរសាទរខួបទី២០ នៃ ការគ្រងព្រះបរមសិរីរាជសម្បត្តិរបស់ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅទីលានខាងមុខព្រះទីនាំងចន្ទច្ឆាយា ព្រះបរមរាជវាំង។

សូមជម្រាបជូនថា ក្នុងមិទ្ទិញមហាជននេះ ព្រះករុណាជាអម្ចាស់ បានអំពាវនាវដល់បងប្អូនប្រជា ពលរដ្ឋកម្ពុជាគ្រប់មជ្ឈដ្ឋានឱ្យរួបរួមសាមគ្គីជាធ្លុងមួយស្ថិតក្រោមដំបូលរដ្ឋធម្មនុញ្ញ និងច្បាប់រដ្ឋ ដើម្បីរួមចំណែកការពារ និងកសាងមាតុភូមិកម្ពុជានៅលើគ្រប់វិស័យ ដោយព្រះអង្គបានសង្កត់ ធ្ងន់ថា មហាសាមគ្គីជាតិទាំងមូល គឺជាមូលដ្ឋានធ្វើឱ្យស្ថានភាពសង្គមជាតិមានសុខសន្តិភាព ស្ថិរភាពនយោបាយ ដែលជាប្រភពកំណត់នៃការអភិវឌ្ឍលើវិស័យនានា ជាពិសេសវិស័យ សេដ្ឋកិច្ចដែលជាដង្ហើមរបស់ជាតិយើង ហើយថា សមិទ្ធផលដ៏ធំធេងទាំងឡាយដែលយើង សម្រេចបាននាពេលនេះ ពិតជាបានមកតាមរយៈការខិតខំពង្រីកនូវវប្បធម៌សន្តិភាព ការផ្សះផ្សា បង្រួបបង្រួមជាតិ ការលើកស្ទួយលទ្ធិប្រជាធិបតេយ្យសេរីពហុបក្ស ការគោរពសិទ្ធិសេរីភាព និង សេចក្តីថ្លៃថ្នូររបស់មនុស្ស ការការពារសន្តិសុខ សុវត្ថិភាព ស្ថិរភាព និងសណ្តាប់ធ្នាប់សង្គម ការកែលម្អអភិបាលកិច្ច ដើម្បីលើកស្ទួយវិស័យសាធារណៈ និងសមធម៌សង្គម និងការលើក កម្ពស់កិច្ចសហប្រតិបត្តិការ ដើម្បីបម្រើសំណូមពរនៃការអភិវឌ្ឍជាតិជាដើម៕