រដ្ឋបាលខេត្តបន្ទាយមានជ័យ ៖ នាថ្ងៃព្រហស្បតិ៍ ទី៨ ខែមករា ឆ្នាំ២០២៦ ឯកឧត្តមបណ្ឌិត ស៊ូនី វង្សវិសិដ្ឋ រដ្ឋលេខាធិការ និងជាអនុប្រធានក្រុមការងារចំពោះកិច្ចរៀបចំ និងគ្រប់គ្រងការស្ដារជីវភាព និងហេដ្ឋារចនាសម្ព័ន្ធដែលខូចខាតពីជម្លោះព្រំដែនកម្ពុជា-ថៃ បានអញ្ជេីញចូលរួមកិច្ចប្រជុំរវាងក្រុមការងារ និងរដ្ឋបាលខេត្តបន្ទាយមានជ័យ ដោយមានការចូលរួមពីឯកឧត្តម អភិបាលខេត្ត និងឯកឧត្តម តំណាងក្រសួង ស្ថាប័ន ជាអនុប្រធាន និងសមាជិកក្រុមការងារ ព្រមទាំងលោកប្រធានមន្ទីរ ស.អ.យ. និងប្រធានសាខាមូលនិធិជាតិជំនួយសង្គមខេត្ត។
បន្ទាប់ពីកិច្ចប្រជុំ ក្រុមការងារបានអញ្ជេីញចុះទៅពិនិត្យទីតាំងផ្ទាល់ មានដូចខាងក្រោម៖
១. ទីតាំងដែលរងផលប៉ះពាល់ដោយសារសង្គ្រាម នៅវត្តសុវណ្ណសិក្ខារាម(វត្តព្រៃចាន់) ក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
២. ចុះពិនិត្យទីតាំងផ្ទាល់ជនភៀសសឹក ដែលបានជម្លៀសពីភូមិជោគជ័យ និងភូមិព្រៃចាន់ ស្ថិតនៅក្នុងវត្តច័ន្ទស៊ីសាមគ្គីរតនារាម ភូមិកូបកើត ឃុំកូប ស្រុកអូរជ្រៅ ខេត្តបន្ទាយមានជ័យ។
