កិច្ចប្រជុំពិសេសរដ្ឋមន្ត្រីអាស៊ានស្តីពីសុខុមាលភាព និងការអភិវឌ្ឍសង្គម និងសន្និសីទគ្រួសារ អាស៊ីលើកទី៤ ឆ្នាំ២០២៤ ក្រោមប្រធានបទ “គ្រួសារអាស៊ីដែលមានភាពរឹងមាំ និងភាពធន់៖ បញ្ហាប្រឈម និងកាលានុវត្តភាព” ដែលបានប្រព្រឹត្តទៅចាប់ពីថ្ងៃទី៥ ដល់ថ្ងៃទី៧ ខែវិច្ឆិកា ឆ្នាំ២០២៤ នៅសាធារណរដ្ឋសិង្ហបុរី ដោយមានការអញ្ជើញចូលរួមពីឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាផងដែរនោះ ឯកឧត្តមបានបំពេញការ ងារដូចខាងក្រោម៖

(១) សម្រាប់កិច្ចប្រជុំពិសេសរដ្ឋមន្ត្រីអាស៊ានស្តីពីសុខុមាលភាព និងការអភិវឌ្ឍសង្គម ឯកឧត្តម រដ្ឋមន្ត្រី ជា សុមេធី បានអញ្ជើញថ្លែងសុន្ទរកថា ដោយបានលើកឡើងពីការដឹកនាំប្រទេសប្រកប ដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ កម្ពុជា ដែលបានបន្តការយកចិត្តទុកដាក់លើការពង្រឹងប្រព័ន្ធគាំពារសង្គម និងបានរំលេចអំពី កម្មវិធីជាតិជំនួយសង្គម ដែលកម្ពុជាបាន និងកំពុងអនុវត្តចាប់តាំងពីឆ្នាំ២០១៩ ដើម្បីជួយគាំទ្រ ដល់ក្រុមគ្រួសាររងគ្រោះ និងងាយរងគ្រោះដែលមានបណ្ណសមធម៌ និងបណ្ណសម្គាល់គ្រួសារ ងាយរងហានិភ័យ តាមរយៈកម្មវិធីជាតិជំនួយសង្គមក្នុងកញ្ចប់គ្រួសារ និងក្រោមក្របខណ្ឌ កិច្ចគាំពារសង្គមឆ្លើយតបនឹងគ្រោះអាសន្ន ដែលការដាក់ឱ្យអនុវត្តកម្មវិធីជាតិជំនួយសង្គម ទាំងនេះបានស្តែងឱ្យឃើញយ៉ាងច្បាស់ពីការយកចិត្តទុកដាក់របស់រាជរដ្ឋាភិបាលក្នុងការជំរុញនូវ គុណតម្លៃនៃការលើកកម្ពស់ឧត្តមប្រយោជន៍របស់គ្រួសារ ការលើកស្ទួយកម្រិតជីវភាពរស់នៅ និងការធានាសុខុមាលភាពរបស់ប្រជាជនគ្រប់រូប។

(២) សម្រាប់សន្និសីទគ្រួសារអាស៊ីលើកទី៤ ឆ្នាំ២០២៤ ឯកឧត្តមរដ្ឋមន្ត្រី ជា សុមេធី បានដឹក នាំប្រតិភូចូលរួមក្នុងសន្និសីទនេះ ដែលជាវេទិកាថ្នាក់តំបន់ ដើម្បីពង្រឹងការអនុវត្តការស្រាវជ្រាវ គោលនយោបាយទាក់ទងនឹងការពង្រឹងគ្រួសារអាស៊ី តាមរយៈការស្វែងរកវិធានគន្លឹះ និងការ ស្រាវជ្រាវពីគ្រួសារដែលមានភាពធន់ វិធីសាស្ត្រផ្តោតលើគុណតម្លៃគ្រួសារចំពោះបញ្ហាសង្គម និងការបង្កើតបណ្តាញសម្រាប់អ្នកអនុវត្តទាំងអស់ក្នុងតំបន់អាស៊ីទាំងមូល។

ក្រៅពីការចូលរួមកិច្ចប្រជុំពិសេសរដ្ឋមន្ត្រីអាស៊ានស្តីពីសុខុមាលភាព និងការអភិវឌ្ឍសង្គម និង សន្និសីទគ្រួសារអាស៊ីលើកទី៤ ឆ្នាំ២០២៤នេះ ឯកឧត្តមរដ្ឋមន្ត្រីក៏មានជំនួបទ្វេភាគីជាមួយ ឯកឧត្តម Masagos Zulkifli រដ្ឋមន្ត្រីអភិវឌ្ឍន៍សង្គម និងគ្រួសារ នៃសាធារណរដ្ឋសិង្ហបុរី ដើម្បី ពិភាក្សាលើគំនិតផ្តួចផ្តើម ស្តីពីកិច្ចសហការប្រតិបត្តិការលើការពង្រឹងកិច្ចការគ្រួសាររវាងក្រសួងទាំងពីរ។ ជំនួបដាច់ដោយឡែកជាមួយព្រះអង្គម្ចាស់ Michael Gorge នៃរាជវង្សអង់គ្លេស និង លោកបណ្ឌិត Robert Glover ស្ថាបនិក និងជានាយកប្រតិបត្តិអង្គការ Care for Children ដោយក្នុងជំនួបកិច្ចពិភាក្សានោះឯកឧត្តមរដ្ឋមន្ត្រីបានថ្លែងអំណរគុណចំពោះព្រះអង្គម្ចាស់ និង លោកនាយកប្រតិបត្តិអង្គការ ដែលបានសហការក្នុងការបំពេញបេសកកម្មរបស់ខ្លួន តាមរយៈ ការអនុវត្តគម្រោងថែទាំកុមារនៅកម្ពុជា ក្នុងរយៈពេលជិត ៣ឆ្នាំកន្លងមកនេះ៕