ទីស្ដីការក្រសួងស.អ.យ.៖ នាព្រឹកថ្ងៃចន្ទ ៦រោច ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៣ ខែកញ្ញា ឆ្នាំ២០២៤ ដោយទទួលបានការអនុញ្ញាតដ៏ខ្ពស់ខ្ពស់ពី ឯកឧត្ដម ជា សុមេធី រដ្ឋមន្ដ្រីក្រសួងសង្គមកិច្ចអតីតយុទ្ធជន និងយុវនីតិសម្បទា លោកជំទាវ ប្រុក ម៉ៃកន្និដ្ឋា រដ្ឋលេខាធិការ និងជាប្រធានក្រុមការងារយេនឌ័រ បានបើកសិក្ខាសាលាស្ដីពី«ការសង្គ្រោះផ្លូវចិត្តបឋម» ដោយមានសមាសភាពចូលរួមចំនួនប្រមាណ២៥នាក់។

គោលបំណង នៃសិក្ខាសាលានេះ គឺដើម្បីពង្រឹងការអភិវឌ្ឍសមត្ថភាពមន្រ្តីរាជការ នៅតាមអង្គភាពក្រោមឱវាទក្រសួង ស.អ.យ. ដែលកំពុងផ្ដល់សេវាដោយផ្ទាល់ និងដោយប្រយោលដល់ជនរងគ្រោះ និងជនងាយរងគ្រោះ អំពីការសង្គ្រោះផ្លូវចិត្តបឋម ព្រោះវាពិតជាមានសារៈសំខាន់ណាស់ដែលយើងគ្រប់គ្នាគួរយល់ដឹង និងចេះប្រើប្រាស់ជំនាញមូលដ្ឋានក្នុងការជួយអ្នកដែលកំពុងរងគ្រោះ ក្រោយពេលយរងគ្រោះ ឬងាយរងគ្រោះពីការប៉ះទង្គិចផ្លូវចិត្ត។

ការសង្គ្រោះផ្លូវចិត្តបឋមមានគោលបំណងផ្ដល់អន្តរាគមន៍ ឬការគាំទ្រភ្លាមៗ ដល់បុគ្គលដែលមានបទពិសោធន៍ប៉ះទង្គិចផ្លូវចិត្ត ដើម្បីជួយពួកគេឲ្យមានអារម្មណ៍សុវត្ថិភាព មិនមានអារម្មណ៍ឯកោ ភ្ជាប់ទំនាក់ទំនងគ្នា អាចគ្រប់គ្រងអារម្មណ៍ប្រកបដោយប្រសិទ្ធភាព ចេះជួយគ្នាទៅវិញទៅមក ជួយឲ្យពួកគេចេះដោះស្រាយបញ្ហា និងបង្កើនភាពធនពីខាងក្នុងរបស់បុគ្គល៕