បាត់ដំបង៖ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកជំទាវ ជា ផល្គុន រសៀលថ្ងៃទី១៥ ខែកញ្ញា ឆ្នាំ២០២៤ បានដឹកនាំគណៈប្រតិភូ អញ្ជើញធ្វើទស្សនកិច្ចនៅមជ្ឈមណ្ឌលព្យាបាល និងស្តារនីតិសម្បទាអ្នកញៀនគ្រឿងញៀន កែ ស៊ីនួន ស្ថិតនៅភូមិស្តៅ ឃុំស្តៅ ស្រុករតនៈមណ្ឌល ខេត្តបាត់ដំបង និងបានប្រគល់វិញ្ញាបនបត្រ បណ្តុះបណ្តាលជំនាញវិជ្ជាជីវៈដល់ យុវជន យុវនារី ដែលបានបញ្ចប់វគ្គសិក្សាចំនួន ៩១នាក់ ព្រមទាំងបានផ្តល់ប័ណ្ណសរសើរដល់លោកគ្រូ អ្នកគ្រូ បុគ្គលិកបម្រើការងារក្នុងមជ្ឈមណ្ឌលនេះ សរុបចំនួន ៤៩នាក់ផងដែរ។
ក្នុងឱកាសនេះ ឯកឧត្តមវេជ្ជបណ្ឌិត កែ ស៊ីនួន ប្រធានមជ្ឈមណ្ឌលបានលើកឡើងថា មជ្ឈ មណ្ឌលព្យាបាល និងស្តារនីតិសម្បទាអ្នកញៀនគ្រឿងញៀន កែ ស៊ីនួន គឺជាកន្លែងទទួលស្តារ នីតិសម្បទាអ្នកញៀនគ្រឿងញៀន ដែលបានចាប់ផ្តើមដំណើរការ កាលពីថ្ងៃទី១២ ខែធ្នូ ឆ្នាំ
២០២២ ហើយរហូតមកទល់ពេលបច្ចុប្បន្ននេះមានជនរងគ្រោះដោយសារគ្រឿងញៀនចំនួន ១៣៣១នាក់ (ស្រី៧៤នាក់) បានចូលមកទទួលសេវាព្យាបាល និងស្តារនីតិសម្បទា ក្នុងនោះ បានធ្វើសមាហរណកម្មទៅសហគមន៍វិញចំនួន ៩១៦នាក់ (ស្រី៥៥នាក់) នៅសល់ជាក់ស្តែង ចំនួន ៤១៥នាក់ (ស្រី១៩នាក់) ។
ក្នុងឱកាសនោះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់មជ្ឈមណ្ឌលព្យាបាល និងស្តារ
នីតិសម្បទាអ្នកញៀនគ្រឿងញៀន កែ ស៊ីនួន ដែលបានព្យាបាលអ្នកញៀនគ្រឿងញឿន ជា ពិសេសបានបណ្តុះបណ្តាលជំនាញវិជ្ជាជីវៈជាច្រើនដល់ប្អូនៗដែលមកព្យាបាល និងទទួលការ ស្តារនីតិសម្បទានៅទីនេះ និងបានកោតសរសើរចំពោះការខិតខំប្រឹងប្រែងរបស់ប្អូនៗផ្ទាល់ ក្នុង ការផ្តាច់គ្រឿងញៀនដើម្បីគ្រួសារ និងសង្គមជាតិ៕
